د مټرولوژۍ قانون طرحه د کابینې د قوانینو کمېټې غونډې ته وړاندې شوه.
سه شنبه
۱۳۹۸/مرغومی/۲۴
د کابینې د قوانینو کمېټې غونډه چې د تېرې یکشنبې په ورځ د ولسمشر د دویم مرستیال او د قوانینو د کمېټې د رییس استاد سرور دانش په مشرۍ جوړه شوه، د سټنډرډ ملي ادارې تخنیکي مرستیال خواجه جاوېد صدیقي، د پلان او پالیسۍ رییس او د مټرولوژۍ امر هم په کې برخه درلوده. په غونډه کې د یو شمېر نورو موضوعاتو تر څنګ د مټرولوژۍ قانون پر طرحه هم بحث وشو.
د مټرولوژۍ قانون طرحه د عدلیې د وزیر عبدالبصیر انور له خوا غونډې ته وړاندې شوه چې په اړه یې بېلا بېل نظرونه ورکړل شول. د مټرولوژۍ قانون د طرحې موخه د اندازه ګیرۍ د واحدونو د تنظیم او تطبیق، د اندازه ګیرۍ د نړیوالو واحدونو د تطبیق او ترویج لپاره د زمینې برابرول، د دغو واحدونو د کارونې لپاره د خصوصي سکټور تشویق او په معاملاتو کې د اندازه ګیرۍ د سټنډرډ وسایلو څخه په ګټه اخیستنې د پیریدونکي او مستهلک د حقوقو تامینول دي چې په اتو فصلونو او (۳۳) مادو کې ترتیب شوې ده.
د غونډې په اوږدو غوره وګڼل شوه، څو دغه طرحه په یوه مقرره بدله شي او د عدلیې وزارت دې یې د سټنډرډ ملي ادارې د صلاحیت لرونکي استازي سره یو ځای د نورو مراحلو لپاره کابینې ته واستوي.
