زبیح الله زیارمل د سټنډرډ ملي ادارې د لوی رییس په توګه وټاکل شو.
۲۸/غویی/ ۱۴۰۰
زبیح الله زیارمل د جمهوري ریاست عالي مقام د حکم پر بنسټ د سټنډرډ ملي ادرې د لوی رییس په توګه وټاکل شو. د نوموړي په معرفت غونډه کې چې د جمهوري ریاست د عامه او سټراتیژیکو اړیکو ادارې د حکومت د اطلاعاتو او رسنیو په مرکز کې جوړه شوې وه، د جمهوري ریاست دویم مرستیال قانون پوه سرور دانش، د بهرنیو چارو او اقتصاد وزیرانو، د مشرانو جرګې مرستیال، خصوصي سکټور، د دې ادارې پخواني رییس او لسګونه نورو اړوندو مسوولینو او د رسنیو استازو په کې برخه درلوده.
ښاغلي دانش د دې ادارې لپاره د ښاغلي زیارمل په ټاکنه خوښي وښوده او د پخواني رییس ښاغلي عزیز احمدزي له هڅو یې مننه وکړه. ښاغلي دانش د سټنډرډ ملي ادارې رهبري یو دروند مسوولیت یاد کړ او د سټنډرډ پر ارزښت او د دې ادارې پر مکلفیتونو، فرصتونو او خنډونو یې بحث وکړ. هغه د دې ادارې له نوې رهبرۍ په غوښتنې سره و ویل چې د ادارې پیاوړتیا ته جدي پاملرنه وکړي.
دغه راز د سټنډرډ ملي ادارې پخواني رییس عزیز احمدزي ښاغلي زیارمل ته د نوي مسوولیت مبارکي ورکړه او په وینا یې چې په دې اداره کې موجود ظرفیت کولای شي، چارې په غوره توګه تنظیم او پر مخ یوسي. نوموړي د دې ادارې په وروستیو لاسته رواړنو او له بهرنیو هېوادونو سره د دې ادارې پر هوکړه لیکونو خبرې وکړې او په دې برخه کې یې د نوې رهبرۍ د پاملرنې غوښتنه وکړه.
د دې ترڅنګ ښاغلي زیارمل د خپلو خبرو پر مهال د دې ادارې لپاره د نوموړي پر ټاکنه د ولسمشر له باور مننه وکړه او په خبره یې چې د ادارې د پیاوړتیا او د چارو د لا ښه سمون او پرمختګ په موخه یې لومړیتوبونه په لسو پروګرامونو کې تنظیم کړي دي چې په لاندې ډول دي:
1. رغیزه مهندسي او د ملي او نړیوالو سټنډرډونو د ګډې ژبې ایجاد
2. د ادارې د مسلکي ظرفیتونو لوړول
3. له بهرنیو هېوادونو سره له ترسره شوو هوکړه لیکونو څخه اغېزناکه ګټه اخیستنه او د لا نورې همکارۍ او تجربې د لاسه راوړلو په موخه د نورو هوکړو ترسره کول
4. د محصول او مدیریت کیفي تصدیق لیکونو ISI 9001_2015 وېش
5. د هېواد پر تولیدي توکو او محصولاتو د سټنډرډ د نښان ترویج او د معیاري توکو د تلپاتې نندارتون جوړول
6. د غوره چوپړتیاو د وړاندې کولو په موخه د ستوریز ملي پروګرام طبقه بندي کول
7. د مټرولوژۍ د قانون پیاوړي کول او د مټرولوژۍ د انسټیټیوټ ایجاد
8. په معیاري توګه د اداري بنسټونو غوره رغونه
9. د ودانیزو، لویو لارو او سړکونو د کوډونو بیا کتنه
10. د ادارې د سټراتیژیک پلان پر بنسټ د کړنلارې ترتیبول
د یادو لومړیتوبونو پلي کول د ملي باور لوړووالي، د پانګې جلبولو، د صادراتو پراختیا، تلپاتې مصونیت، د غوره چوپړتیاو وړاندې کولو او په ښه توګه نړیوال بازار ته د هېواد د توکو او محصولاتو وړاندې کولو سبب ګرځي.
د غونډې په پای کې ښاغلی زیارمل د اړوند پلاوي په ملتیا سټنډرډ ملي ادارې ته تشریف راوړ او په رسمي توګه د دې ادارې کارکوونکو ته ور وپېژندل شو.
