د سټنډرډ ملي ادارې د دعوت او ارشاد رياست له لوري اصلاحي او تربيتي غونډه ترسره شوه.
د سټنډرډ ملي ادارې د دعوت او ارشاد رياست له لوري اصلاحي او تربيتي غونډه د دې ادارې د غونډو په تالار کې ترسره شوه چې د سټنډرډ ملي ادارې لوی رئيس ښاغلي ملا فيض الله تميم، د دې ادارې مرستيالانو، د دعوت او ارشاد رئيس ښاغلي نور احمد ياسر، د سرحدونو، قومونو او قبايلو چارو وزارت د دعوت او ارشاد رئيس ښاغلي مولوي شفيع الله ثاقب او د دې ادارې د بېلا بېلو رئيسانو او کار کوونکو په کې برخه لرله.
غونډه د قران کريم په څو مبارکو ايتونو پيل شوه.
په ياد غونډه کې د سټندرډ ملي ادارې لوی رئيس ښاغلي الحاج ملا فيض الله تميم د دعوت او ارشاد رياست پر ارزښت هر اړخيزې خبرې وکړې او په وينا يې د دين زده کړه مهمه او حياتي چاره ده چې د دعوت او ارشاد رياست يې په غاړه لري؛ پر همدې بنسټ ټول اړ يو چې د دې رياست درناوی او ورسره همکاري وکړو. نوموړي و ويل د ژوند موخه زمونږ له پيدايښت سره تړلې ده او مونږ ټول د خدای ج د بنده ګانو په توګه بايد ټولو هغو مسئوليتونو او مکلفيتونو ته پاملرنه وکړو چې د خدای ج او خلکو پر وړاندې يې لرو او د شرعي احکامو په ترسره کولو سره په خپل وجود کې حقيقت او معنويت نهادينه کړو. د انسا دارې لوی رئيس په جدي او کره ډول د نظم او ډسپلين، په رسمي وختونو کې حضور او په غوره توګه د چارو په ترسره کولو ټينګار وکړ او په خبره يې چې د چارو په ترسره کولو کې غفلت او بې پروايي په هېڅ ډول د منلو نه ده.
په همدې توګه د سټنډرډ ملي ادارې تخنيکي مرستيال ښاغلي مفتي محمد حامد د انسان د پيدايښت په اړه بشپړ معلومات وړاندې کړل او ويې ويل مونږ خپل ملت ته ژمن او په خدای ج پورې متعلق يو. پر دې بنسټ د خدای ج په خوف او شکر سره بايد د خپلو شهيدانو د وينې او ارمانونو درناوی وکړو او خپلې دندې په جدي ډول ترسره کړو.
په همدې توګه د سټنډرډ ملي ادارې د دعوت او ارشاد رئيس ښاغلي نور احمد ياسر د اياتونو او احاديثو پر استناد د علم او عالم په فضيلت اړين ارشادات وړاندې کړل او په وينا يې علم جنت ته د رسېدلو لاره ده او د رسول (ص) د لارښوونو پر بنسټ د شرعي مسايلو رسول د هر مسلمان وګړي دنده ده. ښاغلي ياسر د شرعي علومو د وړاندې کولو په تړاو د دې رياست له لارې د يو شمېر درسي پروګرامونو د وړاندې کولو يادونه وکړه او په دې برخه کې يې له کارکوونکو څخه د جدي پاملرنې غوښتنه وکړه. نوموړي زياته کړه، د هغو کارکوونکو لپاره يو شمېر امتيازات په نظر کې نيول شوي دي چې په پرله پسې ډول درسونه وڅاري.
دغه راز د سرحدونو، قومونو او قبايلو چارو وزارت د دعوت او ارشاد رئيس مولوي شفيع الله ثاقب د اسلام مبين دين د پنځه بناو په تړاو خبرې وکړې او د دين د خونديتوب پر اصل چې په اسلامي ټولنه کې يوه حياتي چاره ګڼل کېږي، ټينګار وکړ. نوموړي له امير المومنين او د ا.ا.ا له مشرتابه څخه د دې رياست د ايجاد په تړاو مننه وکړه.
دغه غونډه د سټنډرډ ملي ادارې د مالي او اداري چارو مرستيال د دعا په ويلو سره پای ته ورسېده.
