د ادارو بانکي حسابونو ته د پیسو مخکې اداینې او د لګښتونو د نوي طرزالعمل د تطبیق اړوند ښوونیزه برنامه په سټنډرډ ملي اداره کې ترسره شوه
دا برنامه چې د مالي او تدارکاتو د برخې اړوند کارکوونکو ته د عامه پوهاوي او د ظرفیت لوړونې په موخه په سټنډرډ ملي اداره کې جوړه شوې وه، د سټنډرډ ملي ادارې د مالي او اداري چارو مرستیال عطأالله فرید، د مالي او اداري چارو رئیس عبدالله السیف، د تدارکاتو او مالي څانګو آمرینو او د اړوندو برخو کارکوونکو پکې ګډون کړی و.
برنامه د اداري او مالي چارو د رئیس مولوي عبدالله السیف لخوا د قرآن کریم په څو مبارکو آیتونو پیل شوه.
په پیل کې د سټنډرد ملي ادارې د مالي او اداري چارو مرستیال د یاد طرزالعمل پر تطبیق تاکید وکړ او زیاته یې کړه :«د اړتیا وړ اسانتیاوو رامنځته کول او په مالي چارو کې چټکیا او شفافیت زموږ له لومړیتوبونو څخه دي».
همدارنګه دا طرزالعمل چې ډېر جامع د یو پرزینتیشن په قالب کې جوړ شوی و د بودیجې د عمومی مدیر نجیب الله له لوري تشریح شو او د ګډونوالو پوښتنه ته یې د قناعت وړ ځوابونه ورکړل.
دا نوی طرزالعمل په ادارو کې د اړتیا وړ اسانتیاوو رامنځته کولو، د بې ځایه لګښتونو څخه د مخنیوي او د امکاناتو څخه د اغیزمنې ګټې اخیستنې په موخه ترتیب شوی دی.
