د سټنډرډ ملي ادارې او د سوداګرۍ نړیوال مرکز (ITC) ترمنځ په انلاین بڼه غونډه ترسره شوه.
د سټنډرډ ملي ادارې او د سوداګرۍ نړیوال مرکز
(ITC) تر منځ په انلاین بڼه غونډه ترسره شوه. په دغه ناسته کې د سټنډرډ ملي ادارې لوی رییس ښاغلي ذبیح الله زیارمل، د سټنډرډ ملي ادارې او د سوداګرۍ نړیوال مرکز (ITC) لوی سلاکار خیمراج رامفول، د خوړو څانګې مسوول بانو نیکولای، په دغه مرکز کې د چاپېریال سلاکار صدیق الله مجددي، د انسا ادارې تخنیکي عمومي رییسې اغلې ساناز سلیمي، د پلان او پالیسۍاو د مطابقت ارزونې رییسانو په کې برخه لرله.
ښاغلي زیارمل د سټنډرډ ملي ادارې د پروګرامونو په تړاو معلومات وړاندې کړل او د یادو پروګرامونو په عملي کولو کې یې د دغه مرکز د لا زیاتو همکاریو په لرلو ټینګار وکړ. په دغه ناسته کې له سوداګرۍ نړیوال مرکز سره د انسا ادارې د اړیکو په پیاوړي کولو او په دې برخه کې د دغه سازمان په لا همکاریو بحث او نظرونه وړاندې شول.
همدارنګه ژمنه وشوه چې دغه سازمان به د مټرولوژي لابراټوار، سټنډرډ جوړونې، د سرټیفکشن پروسې، د زده کړیزو پرګرامونو ترسره کولو او د انتشاراتو په برخه کې همکاري ولري.
د سوداګرۍ نړیوال سازمان اقتصادي او نړیوال مرکز دی چې د لا ډېرو سوداګریزو فعالیتونو په وړاندې کولو کې د اسانتیا راوستلو په موخه په نړیواله کچه فعالیت لري چې په افغانستان کې د صادراتو د ملي سټراتیژۍ په پلي کولو کې فني او سوداګریزې نږدې همکارۍ لري.
د یادونې وړ ده چې د سټنډرډ ملي اداره د دغې ملي سټراتیژۍ په پلي کولو کې د نورو دخیلو ادارو ترڅنګ مهم رول لري.
