د سټنډرډ ملي ادارې تخنیکي مرستیال په ننګرهار ولایت کې د دې ادارې له څانګې لیدنه وکړه.
۱۹/ وری/۱۴۰۰
د سټنډرډ ملي ادارې تخنیکي مرستیال ښاغلی مطیع الله ځلاند ننګرهار ولایت ته د خپل سفر په لړ کې د دې ادارې له ولایتي څانګې لیدنه وکړه. نوموړي د دې لیدنې پر مهال د ننګرهار څانګې له کارکوونکو سره د دوی پر فعالیتونو خبرې اترې وکړې.
د دې ترڅنګ ښاغلي ځلاند د دې ولایت د والي صیب ضیالحق امرخیل سره لیدنه وکړه چې په دې لیدنه کې د سټنډرډ ملي ادارې پر فعالیتونو، لاسته راوړنو او ارزښت خبرې وشوې او د سټنډرډ ادارې د ولایتي څانګې ستونزې یې ورسره شریکې کړې. همدارنګه نوموړي د ننګرهار ولایت د ښاروالۍ له مرستیال صدیق الله جبارخېل سره هم لیدنه وکړه چې د ننګرهار د سټنډرډ آمریت لپاره د یوې ځمکې د تخصیص موضوع یې ورسره شریکه کړه.
د دې سفر په پای کې ښاغلي ځلاند د ننګرهار د سوداګرۍ خونې او د سمنټو اتحادیې له غړو او دغه راز له سوداګرو سره بېلا بېلې لیدنې درلودې چې د هغوی شکایتونه یې واورېدل او په حل لارو یې بحث وکړ. د دې ترڅنګ د آمریت په چارو کې یې د فاسدو اشخاصو د موضوع په تړاو له مرکز څخه راغلي پلاوي ته دنده وسپارله.
ننګرهار ولایت ته د دې ادارې د تخنیکي مرستیال د سفر موخه د ولایتي څانګې د چارو او فعالیتونو له نږدې څاروو چې په لړ کې یې یادو کارکوونکو ته د چارو او فعالیتونو په تړاو لازمې سپارښتنې ورکړې.
