د سټنډرډ ملي ادارې د سوداګرۍ پر وړاندې د تخنیکي خنډونو (TBT) کمیټې غونډه د بېلابېلو وزارتونو او اړوندو دولتي ادارو د استازو په ګډون سره ترسره شوه
په دې غونډه کې د سټنډرډ ملي ادارې د مطابقت ارزونې رئیس مولوي شیر آغا جالب، د ملي سټنډرډونو او ودانیزو کوډونو د جوړونې او رواجولو رئیس مولوي محمد حنیف، د کرنې وزارت، د کانونو وزارت، د ټرانسپورټ وزارت، د کور او ښار جوړونې وزارت، د انرژۍ او اوبو وزارت، د صنعت او سوداګرۍ وزارت، د عدلیې وزارت، د ټولګټو وزارت، د چاپېریال ساتنې اداره، د سوداګرۍ او پانګونې خونه او د اړوندو برخو مسؤلینو ګډون درلود.
غونډه د قران عظیم الشان د څو مبارکو آیتونو په تلاوت سره پیل شوه.
د غونډې په پیل کې د اجنډا سره سم، د تخنیکي خنډونو د تفاهم لیک اغېزې د مخ پر وده هېوادونو لپاره د سټنډرډ ملي ادارې د کارپوهانو لخوا وړاندې شوې او په ګټو یې هر اړخیز بحث وشو.
په غونډه کې ګډونوالو د تخنیکي مقرراتو، شته ستونزو، د حل لارو او نورو اړوندو موضوعاتو په اړه بحث او نظریات تبادله کړل او خپل وړاندیزونه یې شریک کړل.
وروسته، د سټنډرډ ملي ادارې د مطابقت ارزونې رئیس مولوي شیر آغا جالب، د ادارو او وزارتونو ترمنځ د لازمي همغږۍ او همکارۍ پر اړتیا ټینګار وکړ. هغه وویل چې سټنډرډ ملي اداره د سټنډرډونو په برخه کې د څېړنو او نظارت، د ستونزو حل او د سوداګرۍ په برخه کې د اړینو آسانتیاوو برابرولو لپاره هڅې کوي.
په پای کې د وزارتونو او امارتي ادارو استازو د اړوندو مقرراتو او کړنلارو د تطبیق په برخه کې د لا زیاتې همکارۍ ژمنه وکړه او پرېکړه وشوه چې د سوداګرو لپاره د سټنډرډونو په اړه د عامه پوهاوي لپاره غونډې او ورکشاپونه جوړ شي.
