د نفتي موادو د تثبیت مسوولیت د سټنډرډ ملي ادارې ته ولېږدول شو.
د سټنډرډ ملي ادارې (انسا) د مالي او اداري مرستیال ښاغلي احسان جلالزي په مشرۍ یو پلاوي چې د نفتي موادو د برخې کار کوونکي او انجنیران په کې شامل وو، هرات ولایت ته رسمي سفر وکړ چې په لړ کې یې د نفتي موادو د تثبیت مسوولیت د نفتي موادو او اوبلن ګاز د چارو د تنظیم ادارې څخه د سټنډرډ ملي ادارې (انسا) ته ولېږدول شو. د جلالتماب ولسمشر محمد اشرف غني د ځانګړي هدایت او د تدارکاتو کمیسیون د پرېکړې له مخې د نفتي موادو د تثبیت مسوولیت چې مخکې د نفتي موادو او اوبلن ګاز د تنظیم ادارې په غاړه و، له دې وروسته د سټنډرډ ملي ادارې ته وسپارل شو.
د دې سفر په لړ کې یاد پلاوي د دغه ولایت له والي عبدالقیوم رحیمي سره وکتل چې په ترڅ کې یې د سټنډرډ ملي ادارې په فعالیتونو خبرې اترې وشوې او د دواړو لورو له خوا د انسا ادارې او هرات ولایت مقام تر منځ پر همغږۍ تاکید وشو.
د دې ترڅنګ ښاغلي احسان جلالزي او ورسره مل پلاوي د دې ولایت د ولایتي شورا له رییس کامران علیزايي سره هم لیدنه کړه. په دغه لیدنه کې د دواړو لورو له خوا د چارو د لا ښه ترسره کولو په موخه د همغږۍ په را منځ ته کولو بحث وشو.
دغه راز د سټنډرډ ملي ادارې (انسا) رهبرۍ پلاوي د جلالتماب ولسمشر محمد اشرف غني د هدایت او د تدارکاتو کمیسیون د پرېکړې د تطبیق په موخه د هرات ولایت د تورغونډۍ او اسلام قلعه بندرونو ته هم سفر وکړ او د یادو بندرونو وضیعت یې له نږدې وڅاره.
