د ننګرهار ولایت په تورخم بندر کې پنځه جریبه امارتي ځمکه ستنډرډ ملي ادارې ته ځانګړې شوه
د سټنډرډ ملي ادارې د غوښتني او د عالیقدر امیرالمومنین حفظه الله د فرمان په اساس پنځه په پنځو جریبو کې امارتي ځمکه په ټولو هغو ولایتونو کې چې بندرونه لري د کرنې وزارت او مالیې وزارت له لوري سټنډرډ ملي ادارې ته سپارل کیږي.
ددې هوکړه لیک د لاسلیک په غونډه کې چې په تورخم بندر کې د پنځه جریبه ځمکې د سپارلو په تړاو د کرنې وزارت اراضي عمومي ریاست په انګړ کې جوړه شوې وه، د سټنډرد ملي ادارې مالي او ادارې رئیس محترم مولوی محمد عبدالله السیف، د کرنې وزارت د اراضي عمومي رئیس، د ځمکو د تنظیم او وېش رئیس او د اړوندو برخو مسولینو ګډون درلود.
له دې ځمکې څخه به سټنډرډ ملي اداره د اداري ودانۍ او د کیفیت د تثبیت د لابراتوارونو لپاره ګټه واخلي.
سټنډرډ ملي اداره د تولیدي، وارداتي او صادراتي توکو او اموالو د معیاري کولو او کیفیت لوړولو په برخه کې په لویه کچه برنامې په لاس کې لري، چې په جدي توګه به عملي شي
