په سټنډرډ عالي شورا کې د افغانستان اسلامي امارت د ریاست الوزرا اقتصادي مرستیال او د سټنډرډ عالي شورا رئيس الحاج ملا برادر اخوند تر رهبرۍ لاندې (۳۰) سټنډرډونه تصویب شول
٢٨ جمادي الاول ۱۴۴۶ هـ.ق
په دې غونډه کې د سټنډرډ ملي ادارې لوی رئیس الحاج ملا فیض الله تمیم، د یادې ادارې مرستیالانو د وزارتونو او امارتي ادارو مرستیالانو، رئیسانو او د یادو برخو مسؤلینو ګډون کړی و، چې د مرمرینې ماڼۍ د غونډو په تالار کې جوړه شوې وه.
غونډه د قرآن عظیم الشان د آيتونه په تلاوت سره پیل شوه.
په پیل کې د افغانستان اسلامي امارت د ریاست الوزرا اقتصادي مرستیال الحاج ملا عبدالغني برادر د خلکو په ژوند کې د سټنډرډ د ارزښت او اغیزو په اړه هر اړخیزه وینا وکړه، هغه وویل: سټنډرډونو زموږ سره مرسته کوي څو هېواد ته د بې کیفیته توکو له ننه وتلو مخنیوی وکړو. نوموړي د سټنډرډونو په تطبیق تاکید وکړه او وویل: د وزارتونو او امارتي ادارو ټول مسؤلین مکلف دي، څو سټنډرډونه په جدي ډول تعقیب کړي او د هغو د تطبیق په برخه کې ډېر هڅه او زیار وباسي.
وروسته د سټنډرډ ملي ادارې لوي رئیس الحاج ملا فیض الله تمیم د انسا ادارې کاري راپور په مختصر ډول وړاندې کړو او وویل: د سټنډرډ جوړونې پروسه په جدي او کره ډول او په ځواکمنې ارادې سره افغانستان د پرمختګ او ترقۍ خواته بیايي او سټنډرډ ملي اداره پراخې او ډېرې برنامې د ملي پالیسیو د جوړونې، د کیفیت د تثبیت او کنټرول په برخه کې تر لاسه لاندې لري.
د سټنډرډ ملي ادارې رئيس په خپلو خبرو کې زیاته کړه: موږ د خلکو د ژوند د کیفیت کچې لوړولو، د افغانانو اقتصادي ودې او په هېواد کې د سوداګرۍ پراختیا ته ژمن یو.
د غونډې په پای کې د ستنډرډ ملي ادارې تخنیکي مرستیال مولوي محمد آصف قانت د نهايي شویو سټنډرډونو خلاصه چې د ادارې د تخنیکي کمیټو لخوا تصویب ته چمتو وه، غونډې ته وړاندې کړه.پدې سټنډرډونو کې ۳۰ سټنډرډونه او د ازمایښت کړنلارې یې چې د (نفتي توکو، ودانیزو توکو، حلالو توکو، د مدیریت کیفیت سیستم، چاپیریال، کیمیا او پلاستیک، خوارکي توکي او کرنیزو محصولاتږ، نساجي او چرم، الکتروتخنیک او مخابرات، درملیزو او سنګاریزو توکو، کانونو، روغتیا او طبي وسایلو) اړوند و.
یاد سټنډرډونه وروسته له څېړلو او بررسي څخه د سټنډرډ عالي شورا لخوا وروستي او تصویب شول.
په پای کې د سټنډرډ عالي شورا د غړو نظرونه او وړاندیزونه واورېدل او غونډه په اختتامیه دعا سره پای ته ورسیده.
