د سټنډرډ ملي ادارې ځینې کارکوونکو ته د انګلیسي ژبې د زده کړې برنامه پیل شوه
ددې برنامې په موخه چې کومه ناسته د سټنډرډ ملي ادارې د روزنې په تالار کې جوړه شوې وه، د سټنډرډ ملي ادارې د پلان او پالیسي رئیس مفتي محمد حامد، د مالي او اداري چارو رئیس مولوي عبدالله السیف، د سټنډرډ ملي ادارې ویاند او د اړیکو او عامه پوهاوي امر قاري محمد یوسف غاور، د بشیري سرچینو مسؤلینو او په لسهاوو تنو کارکوونکو پکې ګډون کړی وو.
محترم مفتي محمد حامد د علم او پوهې د ارزښت، اهمیت او ګټې په اړه هر اړخیزه وینا وکړه او وویل؛ د زده کړې او کار وړتیا الله تعالی (جل جلاله) راکړې ده، او رسول الله (صلی الله علیه وسلم) ته لومړی امر د لوستلو وشو. نوموړي وویل: د خوښۍ ځای دی چې موږ ته د کار او زده کړو دواړو زمینه برابره شوې ده. موږ باید عصري زده کړې د دین او هېواد لپاره ترلاسه کړو څو وکولای شو له نړۍ سره ځان سیال کړو.
دا برنامه چې په دوه برخو لومړنۍ او منځني کچې پیل شوې ده، د یو کال لپاره به دوام وکړي. یاده ښوونیزه برنامه د کارکوونکو د ظرفیت لوړونې او خلکو ته د ښوو خدمتونو د وړاندې کولو په برخه کې خورا ارزښت لرونکې ده.
