د سټنډرډ ملي ادارې د کندهار څانګې په فعالیت پیل وکړ
شنبه ۲۳/لیندۍ/۱۳۹۸
د سټنډرډ ملي ادارې( انسا) د کندهار څانګې( آمریت) په فعالیت پیل وکړ او عیسی نورزی د دغه آمریت د آمر په توګه معرفي شو. د دغې ادارې لوی رئيس ډاکټر محمد موسی عَلَمي او ورسره پلاوي د تېرې چهارشنبې په ورځ دغه ولایت ته د خپل سفر په لړ کې د والي حیات الله حیات، د کندهار د صنعت او سوداګرۍ رئيس حاجي علاوالدین، د صنایعو او معدنونو خونې مسءولینو او یو شمېر ځایي چارواکو په ملتیا د سټنډرډ ملي ادارې د کندهار څانګه پرانیسته.
دغه څانګه چې له دې وروسته به د تولیدي او وارداتي توکو د كيفيت د كنټرول او معياري كولو په برخه كي كار كوي، د سټنډرډ ملي ادارې د رهبرۍ له زیاتو هڅو وروسته فعالیت پیل کړ.
د انسا د لوی رئيس ښاغلي عَلَمي په وینا چې هڅه کوي تَر څو د تولیداتو، صادراتو او وارداتو کیفیت تضمین کړي او همدارنگه د هيواد په اقتصاد كي د پام وړ وده او پرمختګ وشي.
د کندهار والي حیات الله حیات د خپلو خبرو پر مهال د دغې ادارې پر پرانیستو خوښي وښوده او مننه یې وکړه چې د دې ولایت د وارداتو او داخلي توکو د کیفیت لوړونې لپاره هڅې کېږي.
ښاغلي عَلَمي د دغه سفر په لړ کې له سلاکار وزیر او ولایت مقام مرستیال ښاغلي اغا لالي دستګیري سره هم وکتل چې پر یو شمېر مسایلو یې خبرې اترې وکړې تر څو د سټنډرډ ملي ادارې فعالیتونه په ښه ډول سره په یاد ولایت کې پر مخ ولاړ شي.
