انسا د شفافیت او د فساد د مخنیوي په موخه په دغه اداره کې د نمونې اخیستنې پروسه د کوډ سېسټم ته واړوله.
په افغانستان کې د شفافیت د تامین، حساب ورکونې او د اداري فساد د مخنیوي په موخه د سټنډرډ ملي ادارې د مرکزي لابراټوارونو د فعالیت پروسه (نمونه اخیستنه او پایله) د کوډ په نوي سېسټم تجهیز شوه.
دا سېسټم د سټنډرډ ملي ادارې د لوی رییس ښاغلي ذبیح الله زیارمل په ابتکار پلی شو او د لابراټوارونو د فعالیت په ډول او په ځانګړې توګه د سمپل اخیستنې په پروسه کې بنسټیز بدلونونه راولي. دا چاره د اداري فساد د مخنیوي او د کیفیت د لوړولو په موخه ترسره شوه.
له دې وروسته که چېرې پیریدونکي د نفتي او نورو توکو د کیفیت د ازمېیښت په برخه کې له ستونزې سره مخ کېږي، د انسا د پیریدونکو د چوپړتیاو له دفترسره چې تازه یې په فعالیت پیل کړی دی، مراجعه وکړي او ستونزه دې حل کړي.
