د افغانستان سټنډرډ ملي ادارې او د ازبکستان د سټنډرډ اژانس ترمنځ په انلاين بڼه ناسته تر سره شوه.
۴/چنګاښ/۱۴۰۰
د افغانستان سټنډرډ ملي ادارې او د ازبکستان د سټنډرډ او مټرولوژۍ اژانس ترمنځ د همغږۍ او همکارۍ په موخه ناسته تر سره شوه. په دغه ناسته کې د سټنډرډ ملي ادارې تخنيکي عمومي رييسې اغلې ساناز سليمي، د ازبکستان د سټنډرډ اژانس د بهرنيو اړيکو رييس او د دواړو لورو تخنيکي مسوولينو پکې برخه لرله.
په دغه ناسته کې د دواړو هېوادونو د سټنډرډ ادارو ترمنځ د هوکړې په ترسره کولو بحث او نظرونه وړاندې شول چې د دغې هوکړې له مخې به دواړه لوري د سټنډرډونو، مټرولوژۍ او مطابقت ارزونې په برخه کې هر اړخیزه همکاري کوي.
د بهرنيو هېوادونو له سټنډرډ ادارو سره د اړيکو پياوړتيا د انسا ادارې له لومړيتوبونو څخه ده چې دغه اداره د سيمې په کچه د همکارۍ روحیې د رامنځته کولو په موخه نهستړېکېدونکې هلېځلې کوي.
