د سټنډرډ ملي ادارې او د کابل پوهنتون د فارمسي پوهنځي تر منځ د دوه اړخیزه همکاریو هوکړه لاسلیک شوه.
د کابل پوهنتون په ریاست کې په همدې تړاو جوړه شوې غونډه کې د سټنډرډ ملي ادارې تخنیکي مرستیال مطیع الله ځلاند، د پلان او پالیسۍ رییس، د دارويي او سینګار توکو سټنډرډونو د تدوین تخنیکي متخصصینو، د کابل پوهنتون مرستیال او د دغه پوهنتون د فارمسي پوهنځي رییس پوهاند اقا محمد ژکفر او یو شمېر نورو استادانو برخه درلوده.
په غونډه کې د انسا ادارې مرستیال ښاغلي ځلاند پر هوکړه د خوښۍ څرګندلو ترڅنګ د یادو ادارو ترمنځ د همکارۍ او اړیکو په پراخوالي کې د هوکړې پر رغنده رول خبرې وکړې. هغه دغه راز یادونه وکړه چې د دارويي او سینګار توکو (۸۶) او د خوراکي او کرنیزو توکو (۷۹) سټنډرډونه تدوین شوي دي.
د دې څنګ ښاغلي ژکفر د غونډې ګډونوالو ته د انسا ادارې او فارمسي پوهنځي تر منځ د دوه اړخیزه همکاریو د هوکړه لیک پر موخه او اړوندو مسایلو خبرې اترې وکړې. دغه راز د کابل پوهنتون عمومي رییس د انسا ادارې پلاوي ته د ښه راغلاست ترڅنګ د ژوند په بېلا بېلو برخو کې د دې ادارې پر ارزښت بحث وکړ او د دواړو لورو تر منځ د اړیکو او همکاریو او دغه راز د متقابلو وړتیاو او فرصتونو څخه د ګټې اخیستنې په برخه کې یې د هوکړې لاسلیک کول یو غوره ګام وباله. هغه نه یواځې د دارويي او خوراکي توکو، بلکې په بېلا بېلو برخو کې د همکارۍ د چمتوالي یادونه وکړه.
د دغه هوکړه لیک له مخې به د یاد پوهنځي زده کړیالان په انسا داره کې په عملي توګه د لابراتوارونو چارې ترسره کوي او دې ته ورته دوه اړخیزه همکاري به کوي.
د غونډې په پای کې د فارمسي پوهنځي او د انسا ادارې تخنیکي مرستیال ښاغلي ځلان تر منځ د دوه اړخیزه همکاریو هوکړه لاسلیک شوه.
