د سټنډرډ ملي ادارې د قراردادونو د ارزونې کمېټې ناسته ترسره شوه.
۴/زمری/۱۴۰۰
د مشرتابه پلاوي د مخکې ناستې د پرېکړې پر بنسټ د قراردادونو د ارزونې کمېټې ناسته د اداري او مالي چارو عمومي رییس وحیدالله نوري په مشرۍ ترسره شوه چې رییسانو او اړونده مسوولینو په کې برخه لرله.
ښاغلي نوري د قراردادونو پر شفافیت ټینګار وکړ او زیاته یې کړه د قراردادونو په تړاو ټول موضوعات لکه د اسنادو د مرحلو طی کول، د پروژې مدیریت، د قراردادونو په وړاندې پراته خنډونه، د قرارداد د لورو مسوولیتونه او مکلفیتونه او د پروژو د تطبیق په موخه پانګونه او کړنلارې په سمه توګه تر کارپوهنې لاندې ونیول شي. هغه وښوده د قراردادونو راپورونه باید د موثقو اسنادو پر بنسټ مستند شي او د ادارې له مقام سره شریک شي.
په دغه ناسته کې د تصفیې او له بندرونو څخه د عوایدو راټولو هغه قرارداد وڅېړل شو چې د جیوکم میډلیسټ شرکت ته ورکړل شوی و او پرېکړه وشوه چې د ټولو منعقده قراردادونو ټول اسناد د یوې کاري ورځې په لړ کې د کمېټې غړو ته په لاس کې ورکړي او په راتلونکې ناسته کې د محتوا د لومړیتوب پر بنسټ پر قراردادونو بحث وشي او ټولیز راپور وړاندې شي.
