د سټنډرډ ملي ادارې د مشرتابه او د کابل ولایت مقام ترمنځ د سټنډرډونو د تطبیق د همغږۍ په موخه غونډه ترسره شوه
د سټنډرډ ملي ادارې تخنیکي مرستیال مفتي محمد حامد، د مطابقت ارزونې رئیس مفتي فضل الرحمن منصور, د کابل ولایت والي شیخ الحدیث مولوي ندا محمد ندیم، د اوسپنې د ویلي کولو او د صنایعو د اتحادیې مسؤلینو، اړوندو رئیسانو او د سټنډرډ ملي ادارې تخنیکي ټیم ګډون کړی و.
د دې غونډې هدف د ASTM.M-615 سټنډرډ پلي کول او د نظارت همغږي کول کوم چې د ودانیزو کوډونو پورې اړه لري.
په دې غونډه کې محترم مفتي محمد حامد د سټنډرډ کېدو د ګټو، د هېواد په کورنیو تولیداتو کې د سیخ ګول ودانیزو سټنډرډونو د تطبیق او د وارداتي اوسپنې د وسایلو په اړه هر اړخیز معلومات وړاندې کړل.
د اوسپنې ویلي کولو اتحادیې او صنایعو پلورونکو اتحادیې مسؤلینو د خپلو فابریکو د معیاري تولید په اړه ډاډ ورکړ او ژمنه یې وکړه چې د ساختماني سیخانو په پلور کې به سټنډرډ په پام کې نیسي او د غیر معیاري اوسپنې له پلور څخه به ډډه وکړي.
په پای کې د کابل والي په ټولو کورنیو تولیداتو کې د معیارونو د تطبیق او څارنې په ګډون د سټنډرډونو له تطبیق څخه خپل بشپړ ملاتړ څرګند کړ.
