د سټنډرډ ملي ادارې له خوا د عامې روغتیا وزارت کارکوونکو ته تخصصي ورکشاپ جوړ شو
په دغه روزنیز ورکشاپ چې د عامې روغتیا وزارت لپاره د سټنډرډ جوړونې او تطبیق په اړه جوړ شوی و، د خوراکي توکو د جواز ورکونې او ثبت رئیس محمد ولي عادل، د سټنډرډ ملي ادارې د خوارکي توکو او کرنیزو محصولاتو د سټنډرډونو مسلکي کارکوونکو او د عامې روغتیا وزارت د خوړو او درملو معینیت یو شمېر مسلکي کارکوونکو ګډون کړی و.
د دې ورکشاپ موخه دا وه، چې د خوراکي توکو د سټنډرډونو د تطبیق پر اهمیت د کارکوونکو پوهه لوړه کړي، څو د کیفیت ښهوالی، د خوراکي خوندیتوب تأمین او د عامې روغتیا ملاتړ ته زمینه برابره شي.
پدې ورکشاپ کې د سټنډرډ ملي ادارې د خوراکي توکو او کرنیزو محصولاتو د سټنډرډ جوړونې امر ډاکتر وکیل رحیمي، په خپله علمي او هر اړخیزه وینا کې د سټنډرډ جوړونې اهمیت د کورنیو تولیداتو د کیفیت لوړولو، د ټولنې د روغتیا خوندیتوب او د هېواد د اقتصادي ودې په برخه کې تشریح کړ.
نوموړي همداراز د یو تخصصي پرزینتیشن له لارې ګډونوالو ته د سټنډرډ جوړونې میکانیزم، د تطبیق پړاوونه او د خوارکي توکو په برخه کې عملي بېلګې ور وپېژندلې.
دا ورکشاپ د ګډونوالو او متخصصینو ترمنځ د متقابل بحث او پوښتنو-ځوابونو له لارې پای ته ورسېده.
سټنډرډ ملي اداره د سټنډرډ جوړونې د فرهنګ د پراخوالي ته ژمنه ده او تل هڅه کوي چې د روزنیزو او عامه پوهاوي ورکولو پروګرامونو له لارې د خلکو د روغتیا د خوندیتوب او د محصولاتو د کیفیت د لوړولو لپاره اغېزمن ګامونه واخلي.
