د مرکزي او ولایتي لابراټوارونو د عیارولو په موخه د لابراټوارونو نوی سرپرست معرفي شو.
د سټنډرډ ملي ادارې لوی رییس جناب انجنیر ذبیح الله زیارمل د لابراټواري چارو د غوراوي او انسجام په موخه د دې ادارې د لابراټوارونو سرپرست وټاکلو. د یادونې وړ ده چې ښاغلی انجنیر محمد ابراهیم ابراهیمي د انسا ادارې د لابراټوارونو د برخې یو مسلکي او تجربه لرونکی کارکوونکی دی چې د دې ادارې د یو شمېر مسوولینو په وړاندې د مرکزي لابراټوارونو سرپرست وټاکل شو.
ښاغلي زیارمل نوموړي ته د مرکز او ولایت د لابراټوارونو د فعالولو او عیارولو لارښوونه وکړه او په وینا یې له بده مرغه یو شمېر لابراټوارونه لاهم نه دي کارول شوي چې باید ژر فعال شي او ګټه ترې واخیستل شي، د دې ترڅنګ په بېلا بېلو برخو کې د نوو لابراتوارونو د ایجاد هڅه وشي. هغه له اداري فساد سره د مبارزې او پر وړ واکي ټینګار وکړ او له ابراهیمي یې وغوښتل څو د لابراټوارونو په کاري پروسه کې شفافیت رامنځ ته کړي.
په پای کې ابراهیمي د دې مسوولیت په سپارلو کې د دې ادارې له رهبرۍ مننه وکړه او ژمنه یې وکړه چې د لابراتوارونو د ایجاد، عیارولو او فعالولو په برخه کې جدي کار کوي او همدارنګه له فساد سره په مبارزه کې به خپلې هڅې په کار اچوي.
