د نفتي توکو او مایع ګازو د سوداګرۍ په وړاندې د پرتو ستونزو ارزونه
۱۴۴۴هـ - ق د محرم الحرام ۲۶مه
د سټنډرډ ملي ادارې مشرتابه پلاوي د هېواد له یو شمېر سوداګرو او علمي شخصیتونو سره د نفتي توکو او مایع ګازو د سوداګرۍ په وړاندې د پرتو ستونزو د ارزونې په موخه غونډه وکړه.
په دغه غونډه کې د سټنډرډ ملي ادارې عمومي رئیس جناب الحاج ملا فیض الله تمیم، د ادارې تخنیکي مرستیال محترم مفتي محمدحامد، ملي سوداګرو او د کابل پوليتخنیک پوهنتون استادانو برخه درلوده.
په پیل کې د ادارې عمومي رئیس الحاج ملا فیض الله تمیم ګډونوالو ته ښه راغلاست ووایه او زیاته یې کړه، د سټنډرډ ملي ادارې اساسي موخه د کیفیت د ملي زیربنا تضمین او د خلکو د روغتیا او مصئونیت په پام کې نیول دي. ښاغلي تمیم د خپلو خبرو په دوام، د سټنډرډ ملي ادارې او خصوصي سکتور ترمنځ پر تفاهم او همغږۍ ټینګار وکړ، او له ملي سوداګرو څخه یې وغوښتل چې هېواد ته د بې کیفیته نفتي توکو او مایع ګازو له راوړلو څخه ډډه وکړي.
ورپسې د سوداګرۍ او پانګونې د خونو مرستیال ښاغلي خان جان الکوزي د سوداګرو ستونزې او غوښتنې له ګډونوالو سره شریکې کړې او زیاته یې کړه: "موږ د سټنډرډ له ملي ادارې مننه کوو چې د سوداګرو د ستونزو د حل په موخه یې غونډه جوړه کړې ده."
د غونډې په دوام د کابل پولیتخنیک پوهنتون استادانو د معیاري او غیرمعیاري نفتي توکو د خصوصیاتو په اړه مالومات ورکړل او د نفتي توکو او مایع ګازو په برخه کې د سټنډرډ ملي ادارې سټنډرډونه یې له سیمهییزو او بین المللي سټنډرډونو سره سم وبلل.
ورپسې د سټنډرډ ملي ادارې تخنیکي مرستیال محترم مفتي محمدحامد د غونډې جمعبندي وکړه او ویې ویل، له سوداګرو او علمي شخصیتونو سره نږدې اړیکې له موږ سره د ستونزو په حل کولو کې لویه مرسته کوي. ښاغلي حامد د سوداګرو د ستونزو د حل کولو په برخه کې د سهولتونو د رامنځته کولو ژمنه وکړه.
غونډه د ادارې د دفتر د رئیس ښاغلي وحید احمد بدري له خوا د دعا په لوستلو پای ته ورسېده.
مولوي وحید احمد بدري
د سټنډرډ ملي ادارې د دفتر رئیس
