د ښځو د تاوتریخوالي د مخنیوي کمپاین غونډه ترسره شوه.
۱۸/لیندۍ/۱۳۹۹
په سټنډرډ ملي اداره کې د ښځو د تاوتریخوالي د مخنیوي کمپاین غونډه ترسره شوه. په دغه غونډه کې د دې ادارې لوی رییس عزیز احمدزي، تخنیکي مرستیال مطیع الله ځلاند، مالي او اداري مرستیال عبیدالله شهزاد، د بشري حقونو خپلواک کمیسیون استازي ډاکټر محمد واحد، یو شمېر رییسانو او د دې ادارې لسګونه کارکوونکو برخه درلوده.
د غونډې په پیل کې ښاغلي احمدزي د ښځو د حقوقو په تړاو خبرې وکړې او په وینا یې ښځه په ټولنه کې لوړ موقف لري او باید له حقوقو یې دفاع وکړو. د هغه په خبره ښځه د ټولنې په هره برخه کې د پام وړ رول لري او باید په کاري چاپېریال کې ورته پوره امکانات چمتو شي. نوموړي زیاته کړه، اړینه ده چې په هېواد کې د ښځو موقف وپېژندل شي او د دوی انساني او اسلامي حقوق ادا شي.
د دې ترڅنګ ښاغلي ځلاند له اسلامي اړخه د ښځو پر ارزښت او په ټولنه کې د دوی پر رول بحث وکړ. نوموړي د ښځو په وړاندې د تاوتریخوالي په مخنیوي کې هر وګړی مسوول وګاڼه او په خبره یې باید د ښځو د حقوقو دفاع وکړو او خوندي کاري چاپېریال ورته رامنځ ته کړو.
دغه راز ښاغلي شهزاد په اداره کې د ښځو د کاري چاپېریال د چمتوالي او پراختیا په تړاو خبرې وکړې او په وینا یې ښځو ته به په اداره کې لا زیاته کاري موقع ورکول کېږي. نوموړي زیاته کړه، اوسنۍ رهبري د ښځینه طبقې ملاتړ کوي او په اداره کې به د دوی د حقوقو د خوندیتوب لپاره مناسب ماحول برابروي.
د غونډې په اوږدو کې د جنډر امرې او د یو شمېر نورو ویناوالو له وینا وروسته د دې ادارې د جنډر برخې او یو شمېر نورو ښځینه کارکوونکو ته ستاینلیکونه ورکړل شول.
