په سټنډرډ ملي اداره کې د ښځو نړیواله ورځ ولمانځل شوه.
یکشنبه
۱۳۹۸/کب/۱۸
په سټنډرډ ملي اداره( انسا) کې د ښځو نړیواله ورځ د یو لړ مراسمو په ترڅ کې ولمانځل شوه. په دغه غونډه کې د سټنډرډ ملي ادارې تخنیکي مرستیال خواجه جاوید صدیقي، مالي او اداري مرستیال احسان جلالزي، د دفتر رییس صدیق الله نورزي او د دې ادارې لسګونه نارینه او ښځینه کار کوونکو په کې برخه درلوده.
د غونډې په پیل کې تخنیکي مرستیال ښاغلي صدیقي د ښځو د نړیوالې ورځې اړوند بحث وکړ او دا ورځ یې د ښځو حقوقو ته د نارینه و د پام اړونې یو ښه فرصت یاد کړ. نوموړي و ویل چې باید هڅه وشي څو په ټولنه کې د یو او بل منلو فرهنګ عام شي او ټولنیز عدالت را منځ ته شي. ښاغلي صدیقي د دې ورځې مبارکي د هېواد او نړۍ ټولو مېرمنو ته و ویله.
د دې ترڅنګ مالي او اداري مرستیال احسان جلالزي د دغې ورځې اړوند خبرې وکړې او په وینا یې چې ښځه د ټولنې جوړونکې ده او لو ټوله یې هیله وکړه چې په هره برخه له ښځو سره همکاري وکړي. نوموړي ژمنه وکړه چې په دغه اداره کې به د ښځینه کارکوونکو هر ډول ستونزو ته لاس رسی کېږي.
د غونډې په اوږدو کې د جنډر امرې فروزان قیصاري د ښځو نړیواله ورځ د ښځو د حقوقو د دفاع ورځ یاده کړه او په وینا یې چې دغه ورځ جرائت ورکوي، څو د تاوتریخوالي مخنیوی وکړي او خپل حقوق ترلاسه کړي.
د دغې غونډې په پای کې د ستنډرډ ملي ادارې د رهبرۍ له خوا ټولو ښځینه کارکوونکو ته ډالۍ ورکړل شوې.
