د سټنډرډ ملي ادارې د لوی رییس په مشرۍ اداري غونډه جوړه شوه.
۱۱/سلواغه/ ۱۳۹۹
د سټنډرډ ملي ادارې د لوی رییس عزیز احمدزي په مشرۍ اونیزه اداري غونډه جوړه شوه چې د ادارې مرستیالانو، سلاکارانو، رییسانو او د بېلا بېلو برخو اړونده مسوولینو په کې برخه درلوده.
ښاغلي احمدزي په اداره کې د کارکوونکو تر منځ پر پیاوړې همکارۍ او همغږۍ ټینګار وکړ او دا چاره یې د ادارې پر فعالیتونو اغېزناکه وګڼله. د دې ترڅنګ نوموړي د ودانیزو توکو په برخه کې د ودانیو د رغولو پر مهال د خاورې ټسټ د لابراتوارونو پر مقرره بحث وکړ او په خبره یې چې په نږدې راتلونکي کې به دغه مقرره بشپړه شي او لابراتوار به خپل فعالیت پیل کړي.
د غونډې په اوږدو کې مرستیالانو او ګډونوالو پر بېلا بېلو مسایلو خبرې وکړې او د دې تر څنګ اړونده مسوولینو د تېرې یوې اونۍ د فعالیتونو راپور رهبرۍ پلاوي ته وړاندې کړ.
