د سټنډرډ ملي ادارې د غالیو لابراتوار پرانیست.

چهارشنبه ۲۰/لیندۍ/۱۳۹۸
د سټنډرډ ملي ادارې (انسا) تېره ورځ د یو لړ مراسمو په لړ کې د غالیو لابراتوار پرانیست. په دې تړاو جوړه شوې غونډه کې د دغې ادارې لوی رییس ډاکټر محمد موسی عَلَمي، د غالیو اتحاديې رییس حاجي محمد اعظیم، د انسا ادارې تخنیکي مرستیال خواجه جاوید صدیقي او یو شمېر رییسانو او دغه راز د دې ادارې لسګونه کسانو په کې برخه درلوده.
د یاد لابراتوار په پرانیست غونډه کې ښاغلي عَلَمي و ویل چې د سټنډرډ ملي ادارې د ټاکلو موخو په تعقیب د غالیو د لا معیاري کولو او غوره بازار موندلو په هدف یې د غالیو د ازمېیښت لابراتوار پرانیست. د نوموړي په وینا دغه پروژه چې اپلایدټیک شرکت یې د انسټالېشن او ټریننګ فعالیتونه په غاړه درلودل، د (۱۴،۸) میلیونه افغانیو په ارزښت پلې شوه. هغه زیاته کړه، یاد لابرتوار له دې وروسته د غالیو، تارونو او نساجي په برخه کې شاوخوا (۲۲) ډوله ازمېیښتونه کوي چې خپل خدمتونه به پیل کړي. هغه و ویل چې انسا ادارې د غالیو لپاره (۱۴) ځانګړي سټنډرډونه تدوین کړي دي.
د غالیو د اتحادیې رییس د یاد لابراتوار په پرانیستلو خوښي و ښوده او په وینا یې چې دغه لابراتوار د غالیو په صنعت کې لویه لاسته راوړنه ده او هیله یې وښوده چې په فعالیت سره به یې د غالیو د کیفیت په برخه کې د پام وړ بدلون راشي. نوموړي زیاته کړه، هیله لري چې له دې لابراتوار څخه په فني ډول ګټه واخیستل شي.
د دې ترڅنګ د انسا اداري تخنیکي مرستیال هم یاد لابراتوار لویه لاسته راوړنه وبلله او په وینا یې چې د ملي یووالي حکومت او انسا ادارې موخه د صادراتو او اقتصاد پراختیا ده.
د دغې غونډې په پای کې د سټنډرډ ملي ادارې له خوا د لابراتوار تخنیکي ټیم ته ستاینلیکونه ورکړل شول او د پټۍ په پرې کولو سره یې د غالیو لابراتوار پرانیست.